ఇద్దరు రష్యన్ మహిళలతో సంబంధాలు ఉన్నాయి కానీ: ఎప్‌స్టీన్ కుంభకోణంపై బిల్‌గేట్స్

 లైంగిక నేరస్థుడు జెఫ్రీ ఎప్స్టీన్‌తో తనకున్న సంబంధాలపై మైక్రోసాఫ్ట్ సహ వ్యవస్థాపకుడు బిల్ గేట్స్ తొలిసారి బహిరంగంగా పశ్చాత్తాపం వ్యక్తం చేశారు. అది తాను చేసిన "చాలా పెద్ద తప్పు" అని అంగీకరించారు. అంతేకాకుండా, తన మాజీ భార్య మెలిందాతో వివాహ బంధంలో ఉన్నప్పుడు ఇద్దరు రష్యన్ మహిళలతో వివాహేతర సంబంధాలున్నాయని సంచలన విషయాన్ని బయటపెట్టారు. మంగళవారం బిల్ అండ్ మెలిందా గేట్స్ ఫౌండేషన్ ఉద్యోగుల కోసం ఏర్పాటు చేసిన టౌన్ హాల్ సమావేశంలో ఆయన ఈ కీలక వ్యాఖ్యలు చేశారు.

ఇటీవల అమెరికా న్యాయ శాఖ విడుదల చేసిన ఎప్స్టీన్ ఫైల్స్‌లో బిల్ గేట్స్ పేరు కూడా ప్రస్తావనకు రావడంతో ఈ అంశంపై తీవ్ర చర్చ జరుగుతోంది. ఈ నేపథ్యంలోనే ఆయన ఫౌండేషన్ ఉద్యోగులతో సమావేశమై తన వైఖరిని స్పష్టం చేశారు. "ఎప్స్టీన్‌తో సమయం గడపడం నేను చేసిన పెద్ద పొరపాటు. నేను చేసిన తప్పు వల్ల ఈ వివాదంలోకి లాగబడిన ప్రతీ ఒక్కరికీ క్షమాపణలు చెబుతున్నాను," అని గేట్స్ పేర్కొన్నట్టు వాల్ స్ట్రీట్ జర్నల్ కథనం వెల్లడించింది. ఎప్స్టీన్‌తో తనకున్న పరిచయం ఫౌండేషన్ ప్రతిష్టపై నీలినీడలు కమ్మేలా చేసిందని ఆయన ఆవేదన వ్యక్తం చేశారు.

ఈ సమావేశంలోనే తన వ్యక్తిగత జీవితానికి సంబంధించిన విషయాలనూ గేట్స్ పంచుకున్నారు. "నాకు వివాహేతర సంబంధాలు ఉన్నాయి. ఒకరు రష్యన్ బ్రిడ్జ్ ప్లేయర్, మరొకరు రష్యన్ న్యూక్లియర్ ఫిజిసిస్ట్," అని ఆయన అంగీకరించారు. అయితే, ఆ మహిళలకు ఎప్స్టీన్‌తో గానీ, అతని నేరాలతో గానీ ఎలాంటి సంబంధం లేదని స్పష్టం చేశారు.

ఎప్స్టీన్ చట్టవ్యతిరేక కార్యకలాపాల్లో తాను ఎప్పుడూ పాలుపంచుకోలేదని, అలాంటి వాటిని చూడలేదని బిల్ గేట్స్ తేల్చిచెప్పారు. "నేను ఎలాంటి చట్టవిరుద్ధమైన పనీ చేయలేదు. అలాంటిది ఏదీ చూడలేదు. నేను ఎప్పుడూ అతని బాధితులతో సమయం గడపలేదు," అని ఆయన వివరించారు. ఈ వ్యవహారంపై తన మాజీ భార్య మెలిందా మొదటి నుంచీ అనుమానంగానే ఉండేవారని గేట్స్ గుర్తుచేసుకున్నారు.

ఈ టౌన్ హాల్ సమావేశం జరిగిన విషయాన్ని గేట్స్ ఫౌండేషన్ ప్రతినిధి రాయిటర్స్ వంటి వార్తా సంస్థలకు ధ్రువీకరించారు. బిల్ గేట్స్ తన చర్యలకు బాధ్యత వహించారని, ఉద్యోగులు అడిగిన పలు ప్రశ్నలకు నిక్కచ్చిగా సమాధానాలు ఇచ్చారని ప్రతినిధి తెలిపారు.